Жамбыл облысында оқушысы қайтыс болған мектептің директоры қызметіне оралды

Байзақ ауданының прокуратурасы Құмжота ауылы мектебінің директоры Қанатбек Байтенге қатысты қылмыстық істі тоқтатты. Бұған дейін оны оқушының қазасынан кейін қылмысты жасыруы мүмкін деген күдікпен тергеген. Алайда тергеу барысында айыптауға негіз болар дәлел табылмады, деп хабарлайды Orda.kz.

Мектеп директорының өзі бұл кезеңнің өте ауыр өткенін айтты:

«Бұл жағдайды өте ауыр қабылдадық. Мен қызметімнен шеттетілдім. Жарты жыл бойы тергеу жүргізілді. 29 қыркүйектен бастап қайта қызметіме оралдым», – деді Қанатбек Байтен.

Еске сала кетейік, бұған дейін Алматы облысында жасөспірімдер арасындағы жантүршігерлік жағдай қоғамда үлкен резонанс тудырды. Жамбыл ауданының Қарғалы ауылында бір топ оқушы жетім қызды жыныстық сипаттағы әрекеттерге мәжбүрлеп, оны бейнежазбаға түсіріп, әлеуметтік желідегі топтарға таратқан. Қазір бұл оқиға бойынша полиция Қылмыстық кодекстің 124-бабы («жас балаларды азғындық жолға түсіру») бойынша іс қозғап, тергеу жүргізіп жатыр.