Үш келі сынапты 100 млн теңгеге сатпақ болған түркістандық ұсталды

Алматы облыстық полиция департаментінің ұйымдасқан қылмысқа қарсы күрес басқармасының қызметкерлері арнайы операция барысында ірі көлемдегі сынапты заңсыз сату әрекетін әшкереледі, деп хабарлайды Orda.kz.

Жедел-іздестіру шаралары облыстық прокуратураның үйлестіруімен және Алматы облысы бойынша ҰҚК департаментімен бірлесіп жүргізілген.

«Затты 100 млн теңгеге сатпақ болған кезде Түркістан облысының 28 жастағы тұрғыны ұсталып, уақытша ұстау изоляторына қамалды», — деп мәлімдеді Алматы облысы ПД бастығы Мейрам Әбікеев.

Мәміле жасалған жерде ішінде үш келіден астам металл сынабы бар шыны ыдыс тәркіленді.

Ведомство мәліметінше, арнайы операция сынапты заңсыз мақсатта пайдаланудың алдын алып, одан да ауыр салдардың болуына жол бермеді.

Сынапты кен орындарынан қолмен алтын өндіру тәсіліне пайдалануға болады. Сонымен қатар ол жарылғыш заттың бастапқы қажетті элементі. 

Бұдан бөлек, сынап — аса улы химиялық зат, ол адам өмірі мен денсаулығына үлкен қауіп төндіреді. Оның буы ауыр улануға, жүйке жүйесінің зақымдануына әкеліп, ағзада және қоршаған ортаға ұзақ мерзімді зиян келтіруі мүмкін.

Оқи отырыңыз: 

• Қырғызстандық спортшы 190 тонна болатын сегіз вагонды 6,5 метрге сүйреді
• Алматылық мектеп оқушысы БҰҰ-да ауадан су өндіру технологиясын таныстырды
• Қостанайда тірі адамның қолына «қайтыс болғаны» туралы күәлігін ұстатқан