Үкімет медицина қызметкерлеріне шабуыл жасағандарға жазаны қатаңдатудан неге бас тартты

Қазақстан үкіметі медицина қызметкерлеріне шабуыл жасағандарға жазаны қатаңдату туралы бастаманы қолдамады. Денсаулық сақтау министрлігі мен депутаттар дәрігерлерге жасалған шабуылды полиция қызметкеріне жасалған шабуылға теңестіруді ұсынды.

Сенат отырысында денсаулық сақтау вице-министрі Тимур Сұлтанғазиев бұл норманы құқық қорғау органдары қажетсіз деп есептегенін айтты.

«Бұл нормаға құқық қорғау органдары, ішкі істер министрлігі, бас прокуратура, әділет министрлігі және жоғарғы сот қарсы болды. Олар бүгінде барлығына ортақ нормалар бар екенін айтып отыр, яғни барлық мемлекеттік қызметкер өзінің кәсіби қызметін атқару кезінде денсаулығына немесе өміріне зиян келген жағдайда жалпы стандарттар бойынша қорғалады», - деді Тимур Сұлтанғазиев. 

Алайда денсаулық сақтау министрлігі бұл норманы талап етіп, оны заңнамалық тұрғыдан қайта енгізбекші. Бұған себеп, Сұлтанғазиевтің айтуынша, дәрігерлер мен жедел жәрдем жүргізушілеріне шабуыл жиілеген.