Визасыз режим Қазақстан мен Қытай арасындағы қарым-қатынастың жаңа тарауын ашады - Әлихан Смайылов

Премьер-министрдің айтуынша, визасыз жүру 10 қарашадан бастап күшіне енетін болды.

Шанхайға жұмыс сапары аясында Премьер-Министр Әлихан Смайылов Қытай Халық Республикасы Мемлекеттік кеңесінің Премьері Ли Цянмен кездесу өткізіп, онда екі ел арасындағы сауда-экономикалық ынтымақтастықтың өзекті мәселелері талқыланды, деп жазады primeminister.kz.

Әлихан Смайылов әріптесін қарсы ала отырып, Қазақстанның Қытаймен достық, тату көршілік және стратегиялық әріптестік байланыстарын нығайтуға ерекше мән беретінін атап өтті.

«Екі елдің жоғары басшылығы арасындағы жеке достық байланыстар біздің өзара іс-қимылымыздың барлық жағдайына оң әсер етеді. Қазақстан Президенті Қасым-Жомарт Тоқаев пен ҚХР Төрағасы Си Цзиньпиннің жақында өткен келіссөздері «алтын 30 жылдықтың» келесі дәуірінде Қазақстан-Қытай ынтымақтастығын жаңа мазмұнмен толықтыруға мүмкіндік берді», - деді Премьер-Министр.

Үкімет басшысы атап өткендей, Қытай Қазақстанның ірі сауда серіктестерінің бірі. Мәселен, өткен жылы екіжақты тауар айналымы 35 пайызға артып, рекордтық көлемге — 24,2 миллиард долларға жетті. Биылғы жылы динамикалық өсу жалғасуда: өзара сауда тағы 21%-ға өсті.

Премьер-Министрдің айтуынша, енгізілген визасыз режим Қазақстан Республикасы мен ҚХР арасындағы іскерлік байланыстарды ынталандыруға, сауданы жеңілдетуге, өзара инвестицияларды арттыруға және туризмді дамытуға айтарлықтай ықпал етеді.

«Оның 10 қарашада күшіне енуі біздің қарым-қатынасымыздағы жаңа тарауды ашады. Бұл, әсіресе, алдағы «Қазақстанның Қытайдағы туризм жылы» аясында өзекті. Бұл шара азаматтарымыздың саяхатын қолжетімді етіп, байланысымызды одан әрі нығайтады деп ойлаймын», – деді Әлихан Смайылов.

Жалпы, ол Қазақстан үкіметінің Қытаймен ынтымақтастығын үдемелі дамыту үшін бар күш-жігерін салуға дайын екенін атап өтті.