«Тышқанның балаларын шақырамын»: Шымкенттегі ауруханадағыларды сабаған азамат қамалды

Шымкентте белгісіз біреу ауруханаға баса-көктеп кіріп, сол жерде болған азаматтың бірін соққыға жығып, полиция қызметкеріне шабуыл жасап, ұлтаралық араздықты қоздыратын қорлайтын сөздер айтқан, деп хабарлайды Orda.kz.

Полиция департаментінің мәліметінше, ер адам бұрын түрмеде отырғанына мақтанып, өзімен өзі отырған екі адамды ұрып-соққан.

Бейнежазбада ер адамның ұрып соққаны, балағат сөздер айтқаны, «өзбек ұлтына қатысты» сөздер айтқаны байқалады. Сонымен қатар сабырға шақырған адамдармен ерегесіп, прокуратураны, полицейлерді шақыруын талап етеді. Кейін формадағы азаматтың кеудесінен итеріп, ерегісе кетті. 

«Тышқан ба? Тышқанның балаларын шақырамын! Соқыр ма? Соқырдың балаларын шақырамын!», – деп ер адам полицейге сес көрсетті. 

«Ер адам ұсталып, уақытша ұстау изоляторына қамалды. Қазіргі уақытта тергеушілер оқиғаның барлық мән-жайын анықтап жатыр. Ал тергеу барысын басшылық бақылауына алды»,  деп мәлімдеді полицейлер. 

Еске сала кетсек, Түркістан облысы Төрткүл ауылында 16 жастағы қызды бірнеше адам зорлап, аяусыз өлтіріп кеткен еді.