Түркістанда 12 адамның өмірін жалмаған өрт: Аман қалған үш адамның бірі есін жиды

Алғабаста 12 адамның өмірін жалмап кеткен өртен аман қалған үш адамның бірі есін жиды, деп хабарлайды Orda.kz. 

Айта кетейік, Түркістан облысының Алғабас ауылында 18 қарашада алапат өрт шықты. 360 шаршы метрлік жеке үйде болған апат салдарынан 12 адам қаза тауып, үш адам жарақатпен ауруханаға жеткізілді.

Бұған дейін Алғабастағы дәрігерлер өрттен зардап шеккендердің үшеуі жансақтау бөлімінде екенін мәлімдеген еді. 

Түркістан облысы әкімінің бірінші орынбасары Зулфухар Жолдасов науқастардың бірінің жағдайының жақсарғанын хабарлады.

«Зардап шеккендердің бірі есін жиды. Қажет болған жағдайда үшеуі де аудандық ауруханадан астанаға санитарлық авиациямен тасымалдауға дайын», — деді Жолдасов. 

Оқиғаға дейін отбасы сүндет тойын атап өткен. Мереке алдымен мейрамханада өткен, кейін үйде жалғасқан. Полиция өрттің нақты себебін анықтау үшін тергеу жүргізіп жатыр.

Прокуратура бұл оқиғаға қатысты ҚР Қылмыстық кодексінің 292-бабының 3-бөлігі бойынша іс қозғады. Оқиға орнына Жетісай аудандық полиция және прокурорлық құрамдағы қызметкерлер келді. Сот-медициналық сараптама тағайындалды.