Түркістан облысында қаржы пирамидасын ұйымдастырған 20 адам сотталды

Айыпталушылар арасында мұғалімдер мен дәрігерлер бар, деп хабарлайды Orda.kz.       

Шығын көлемі 392 миллион теңгеге жеткен. Жәбірленушілерге залалды өтеу мәселесі бойынша тергеу әлі де жалғасады.

Түркістан облысында қаржы пирамидасын ұйымдастыру ісі бойынша сот үкімі шықты. Айыпталушылар орындығында 20 адам отыр. Олардың қатарында мұғалімдер, дәрігерлер, бухгалтерлер және жұмыссыз азаматтар бар.

Іс материалдарына сәйкес, қаржы пирамидасының қызметіне 279 салымшы тартылған, алайда сот тек 54 адамды ғана жәбірленуші деп таныды.

Сотталғандардың ең жасы – 24 жаста, ең үлкені – 65 жаста. Айыпталушылардың бірі бұрын сотталған. Кейбір сотталушылар кінәсін ішінара мойындады. Екі адам 5 жыл 6 ай бас бостандығынан айырылса, 12 адамға 2 жылға бас бостандығын шектеу жазасы тағайындалды, тағы бес адамның бостандығы 3 жылға шектелді.

«Ұйымдастырушылардың бірі Қылмыстық кодекстің 217-бабы 3-бөлігі 2-тармағы — «Қаржы пирамидасын құру және оған басшылық ету» бойынша қылмыс жасағаны үшін кінәлі деп танылды. Сот оған 7 жыл бас бостандығынан айыру жазасын тағайындап, дәл осы мерзімге қаржы тарту және инвестициямен байланысты қызметпен айналысу құқығынан айырды»,  деп мәлімдеді облыстық сот. 

Жәбірленушілерге келген 392 миллион теңге көлеміндегі шығынды өтеу мәселесі бойынша тергеу әлі жалғасуда.

2025 жылдың ортасында хабарланғандай, Қазақстанда жыл басынан бері 36 қаржы пирамидасы жойылған. Олардың құрбандары – 86 мыңнан адамнан асты.

Сонымен қатар азаматтары телеграм-бот арқылы компаниялардың қаржы пирамидасы белгілерінің бар-жоғын тексере алатынын еске саламыз.

2024 жылы әлеуметтік желілерді талдайтын IT құралдарын пайдалана отырып, 600 мың адам аудиториясын қамтитын қаржылық пирамида белгілері бар сайттар мен аккаунттардың мыңға жуық сілтемесі бұғатталды.

Биылғы жылдың басында Asar Baspana қаржы пирамидасының жолы кесілді. Алматы қаласында «Warner Bros», «Roborock» және «NFT+TRX» қаржы пирамидаларының қызметі тоқтады.