Түркістан облысында бойжеткен айналдырған 15 минутта көлігімен екі бірдей оқушыны басып кетті

Жол апаты бейнекамераға түсіп қалған екен. Ол жерден жолдан жүгіріп өтіп бара жатқан балақайдың көлік астында қалып кеткенін көруге болады. 2-сынып оқушысын қаққан қытайлық көлік тоқтамаған да, деп хабарлайды Orda.kz.

Көлік қайта жүйткіген күйде мектеп маңына барып, қоршауын бұзып өткен. Ол аздай айдалада отырған келесі оқушыға жетіп, оны да ұшырып жіберген дейді куәгерлер. 

«Көлік алдымен үлкен қақпаға қарай бағыт алып, жанындағы қоршауды бұзып өтті. Біз ол кезде оқушыларды шығарып салып тұрғанбыз. Бәріне «қашыңдар» деп айғайлап тұрғанымызда, арғы шетте отырған қыз байқамай қалды. Сөйтіп, көлік шыршаны басып өтіп, соңында орындықта отырған оқушыны ұшырып жіберді. Абдырап тұрғанымызда көшенің басында тағы бір оқушымызды дәл осы көлік қағып кеткенін естідік», – дейді оқиға куәгері болған мектеп мұғалімі Ольга Магдалинова.

Көшесі тар мектеп маңында абырой болғанда біршама ата-ана тұрған екен. Жүгіріп келген олардың бірі көлік астында қалған 4-сынып оқушысына қараса, қалғаны жүргізушіге барған. Айналдырған 15 минутта екі оқушыны қаққан қыз көліктен оңайлықпен түсе қоймаған. Әуелі телефонға телмірген ол бірден талып қалды дейді куәгерлер. 

«Көлік тоқтаған соң жүргізуші бірден шықпады. Телефонын қарап отырып, кейін талып қалды. Айналада жүрген ата-аналар жүгіріп келіп, даладағы орындыққа жатқызды. Оқушыға ештеңе болған жоқ. Орындықтың үстіне шыққан кезде артынан соғып, әрі қарай ұшырып жіберген. Астында қалып кеткен сияқты болған. Бірақ, шын мәнінде олай емес», – дейді оқиға куәгері болған мектеп күзетшісі Нұрбол Балғабаев.

Соққының қатты болғанына қарамастан балалардың екеуін де періште қақты дейді мұғалімдер. Аман қалған бастауыш сынып оқушыларының екеуі де ауруханаға жеткізіліп, беті бері қараған соң ата-аналары үйіне алып кетіпті. Әзірге олар сабаққа барып жүрген жоқ. Ал, жай отырған балаларды өлтіре жаздаған жүргізуші қыз қамауға алыныпты. 

«Жүргізуші ұсталып, қамауға алынды. Барлық мән-жайларды анықтауға бағытталған қажетті іс-шаралар жүргізілуде. Бейнебақылау камераларындағы жазбалар зерттеліп, куәлардан жауап алынып жатыр. Тергеу нәтижелері бойынша тиісті шешім қабылданады», – дейді Түркістан облыстық ПД баспасөз қызметі.

Айта кетейік, жол көлік апаты Түркістан облысы Сайрам ауданы Ақсукент ауылында болған. Жұма күнгі кешкі сағат жетілерінде болған оқиғадан соң ата-аналар тіпті қорқып қалыпты. Олар қазір балаларын мектепке өздері алып келіп, алып кетуге көшкен. Полиция департаменті жүргізуші мүгедек деген ақпаратты жоққа шығарды. Ал, оның көлікті мас күйінде тізгіндегенін не растаған жоқ, не жоққа шығармады.

Авторы: Назерке Еркінбекқызы, Түркістан облысы