Трамп АҚШ пен Ресей арасындағы келіссөздердің екінші кезеңінің күні мен орнын жариялады

АҚШ президенті Дональд Трамп Украинадағы әскери қақтығысты тоқтату үшін америкалық және ресейлік дипломаттар арасындағы келіссөздердің екінші раунды басталғанын мәлімдеді, деп хабарлайды Orda.kz Euronews арнасына сілтеме жасап.

Трамп Ресей мен АҚШ арасындағы келіссөздердің 25 ақпанда Сауд Арабиясының астанасы Эр-Риядта өтетінін айтты.

Еске салайық, екі мемлекет өкілдері арасындағы келіссөздердің бірінші раунды 18 ақпанда Эр-Риядта өткен болатын. Ресей делегациясын Ресей Сыртқы істер министрі Сергей Лавров, ал америкалық делегацияны АҚШ Мемлекеттік хатшысы Марко Рубио басқарды. Тараптар Мәскеу мен Вашингтон арасындағы екіжақты қарым-қатынасты жақсарту, сондай-ақ Украинадағы әскери қақтығысты реттеу мәселелерін талқылады.

Бұған дейін Ақ үйдің баспасөз хатшысы Кэролайн Левитт АҚШ президенті Дональд Трамптың Украинадағы қақтығысты тоқтату туралы келісімге осы аптаның басында қол жеткізуге болатынына сенімді екенін хабарлаған.

Оның айтуынша, Вашингтон белсенді дипломатиялық күш-жігерін іске қосып, келссөзді жалғастыруда, ал Ұлттық қауіпсіздік жөніндегі кеңесші Майк Уолц осы демалыс күндері келісімге келу және қақтығысты тоқтату үшін тәулік бойы жұмыс істеп жатыр.

Трамп пен Ресей президенті Владимир Путиннің ықтимал кездесуі туралы сұраққа жауап бере отырып, ол әзірге ештеңе жариялай алмайтынын немесе нақтылай алмайтынын, бірақ Ақ үй екі тараппен келіссөздерді жалғастырып жатқанын айтқан еді.