Тоқаев Астанаға келетіндерге бақылауды күшейту қажет екенін айтты

Президент Қасым-Жомарт Тоқаев Астанадағы халық санының шамадан тыс өсуі қала инфрақұрылымына зор қысым түсіріп отырғанын айтты. Оның сөзінше, мектептерде, ауруханаларда орын жетіспейді, ал жылу мен су жүйесінің тұрақтылығы қауіпті жағдайға жетуі мүмкін, деп хабарлайды Orda.kz.

Президент Үкіметке ел ішіндегі және шетелден келетін көші-қон ағындарын бақылау үшін бірыңғай цифрлық жүйе енгізуді тапсырды.  

«Бақылаусыз ішкі және сыртқы миграция азаматтар шоғырланатын ірі қалалардың инфрақұрылымына орасан зор салмақ түсіреді. Оның айқын мысалы Астана. Соңғы үш жылда елорда тұрғындарының саны 250 мыңнан астам адамға артты. Соның ішінде былтыр – шамамен 100 мың. Биылғы өсім бұл межеден де асып түсуі мүмкін. Қала инфрақұрылымы ресми 1,5 млн тұрғынға емес, күнделікті 1,9 млн адамға қызмет көрсетіп отыр. Басқаша айтқанда, орташа бір қаланың халқына тең 400 мыңнан астам адам жоспардан тыс Астанада тұрып жатыр. Бұл жағдай жылу мен су жүйелерінің тұрақтылығына қатер төндіреді», – деді Тоқаев

Сонымен қатар, Тоқаевтың айтуынша, 2022 жылдан бері Астанада мұқтаж жандарға 7 мыңға жуық пәтер берілген. Соның ішінде 1380 пәтер – көпбалалы отбасыларға, 835 пәтер – жетім балаларға, 665 пәтер – ерекше қажеттіліктері бар адамдарға бөлінген.

«Кейбір облыс әкімдері корпоративтік салықтан түскен қаржыны тиімді пайдаланбай, тас төсемдер төсеу сияқты пайдасы аз жобаларға жұмсауда. Сондықтан азаматтар әлеуметтік қолдау көрсетілетін астанаға ағылып келіп жатыр», – деді президент.

Мемлекет басшысы мектеп инфрақұрылымы шектен тыс жүктемеге ұшырағанын атап өтті. Жыл сайын кемінде 15 жаңа мектеп салу қажет. Сондай-ақ, қалада аурухана төсектері мен емханаларда орын жетіспейді. Қала әкімдігі даму жобаларын жүзеге асырудың орнына, бюджет қаржысының 60 пайызын әлеуметтік шығындарға бөлуге мәжбүр болып отыр.