Tinder-де «Нұрай» атымен ақша сұраған жігіт 3 жылға бас бостандығынан айырылды

Интернет-алаяқтық жолмен табыс тапқысы келген 20 жастағы астаналық тұрғынға сот үкім шығарды, деп хабарлайды Orda.kz

Жас жігіт Tinder қосымшасына «Нұрай» деген есіммен тіркеліп, Telegram желісіндегі парақшасына сілтеме қалдырған. Telegram желісінде ол бөтен қыздың суретін қойып, айыптаушымен месенджер арқылы сөйлескен. «Нұрай» есімін жамылған жігіт одан түрлі сылтаумен ақша сұрап, тіпті кезесуге де уәде берген. Ештеңеден күдіктенбестен, айыптаушы оған 3 айда шамамен 4 миллионға жуық ақша жіберген.

Сот құқық бұзушыны ақпараттық жүйені пайдаланушыға қатысты ірі көлемде алаяқтық жасағаны үшін кінәлі деп таныды.

Қылмыстық жауаптылықты жеңілдететін мән-жайларды,  істеген ісіне шын жүректен өкінгенін, сондай-ақ мүліктік залалды өз еркімен өтегенін және ауырлататын мән-жайдың болмағанын ескере отырып, сот үкімі шықты. Оған пробациялық бақылау орнатылып, 3 жыл бас бостандығын шектеу түріндегі жаза тағайындалды.