Тимур Құлыбаев мұнай компаниясын әлі сатпады

Forbes тізіміндегі миллиардер Тимур Құлыбаев негізі мұнай активі – «Каспий мұнай» компаниясын сатпақ. Бірақ «Каспий мұнай» АҚ-ны сату бойынша мәміле әлі жасалмады. Бұған дейін компания мүдделі тараптар арасындағы келісім жасалып жатқанын мәлімдеген. Ал  сарапшылар компания иесін ауыстыру мәселесі баяғыда-ақ шешілгенін айтқан болатын, деп хабарлайды Orda.kz. 

KASE ақпаратына зер салсақ, 1 қазандағы жағдай бойынша «Каспий мұнай» АҚ-ның барлық 100 мың акциясы «Joint Resources» АҚ жалғыз меншік иесіне тиесілі. Ал «Joint Resources» акцияларының барлығына Қазақстанның ең бай бизнесмендерінің бірі Тимур Құлыбаев иелік етеді. 5,3 млрд доллар байлығы бар ол Forbes тізімінде төртінші орында тұр.

Демек, Құлыбаев «Каспий мұнайын» сату жоспарынан бас тартты немесе келісімге әлі келе қоймаған. Тамыз айының соңында сала сарапшылары «Каспий мұнайы» жақын арада иесін ауыстыратынын жоққа шығармаған еді. 

Айта кетейік, «Каспий мұнайдың» өзі 2024 жылы 38 млрд теңге қарызға батқан. Таза табысы 33,5 млрд теңге болды. Сол жылы компания топ-менеджерлерге 159,4 млн теңге төлеген, яғни айына орта есеппен 13,3 млн теңгеден. Ал акционерлерге дивиденд төлеу екінші жыл қатарынан кейінге қалдырылды.