Темірлан Еңсебектің адвокаты апелляциялық шағым түсірді

Темірлан Еңсебектің адвокаты апелляциялық шағым түсірді. Бұл іс енді апелляциялық іс жүргізу аясында Алматы қалалық сотында қаралуы тиіс, деп хабарлайды Orda.kz.

11 сәуір күні Наурызбай аудандық соты Темірлан Енсебекті ҚР ҚК 174-бабы («Ұлтаралық араздықты қоздыру») бойынша кінәлі деп таныды. Темірлан Еңсебек Qaznews24 парақшасында Тина Канделаки туралы жарияланған жазбаға қосып қойған «Йоу, орыстар» әніне байланысты «экстремист» болып танылды.

Сонымен қатар, оған жылына 100 сағаттық мәжбүрлі еңбек жазасы белгіленді. Дәлел ретінде алынған ноутбук пен телефон мемлекет меншігіне өткізілді. Енді сатирикке сұхбат беруге, әлеуметтік желілерді жүргізуге, гранттар алуға, эфирлерге қатысуға, онлайн және офлайн кездесулер өткізуге, сондай-ақ ойын-сауық өтетін жерлерге баруға тыйым салынған. 

Адвокат Жанар Балғабаева Наурызбай аудандық соты арқылы шағым түсіргенін айтты. Бұл шағым бір ай ішінде қаралып, апелляциялық сот отырысы Алматы қалалық сотында өтуі тиіс:

«Мен қысқаша шағым түсірдім. Ал апелляциялық шағымды толықтырып жатырмыз. Дәлелдер өте көп. Қазір сот кабинеттерінде үлкен өзгерістер болып жатыр, жүйе дұрыс жұмыс істемейді, сондықтан мен e-Otinish арқылы жолдадым. Мерзімнен кешікпедік», — деді Балғабаева.

Адвокаттың айтуынша, Еңсебекке қатысты соттың шектеу шаралары апелляциялық шағым қаралғаннан кейін ғана күшіне енеді. Алайда сотпен бекітілген міндеттемелерді орындау керек.

«Үкім әлі заңды күшіне енген жоқ, бірақ онда мінез-құлыққа қатысты міндеттемелер жайлы ескерту болды. Мысалы, егер ол қазір белсенді түрде жазуды бастаса, оны құқық бұзушылық ретінде бағалауы мүмкін. Сондықтан бұл жерде абай болу керек. Дәл осы мақсатпен бәрі жасалды. Жалпы алғанда, үкім заңды күшіне енбейінше, ол пікір білдіруге құқылы, бұл шектеулер оған қолданылмайды», — деді Балғабаева.

Темірлан Еңсебек ісі бойынша өткен сот отырысы қоғамда үлкен резонанс тудырып,  шиеленіске толы болған еді. Белсенділер ұсталды. Журналистерге шектеулер қойылды. Үкім шыққанда судьяға «Ұят!» деп айқайлағандар болды. Соңғы отырыс жайлы толық репортажды осы жерден оқуға болады.

Енді Алматы қалалық сотының апелляциялық отырыс күнін белгілегенін күту ғана қалды.