Таразда саябақта орнатылған жаңа жылдық шырша өртенді

31 желтоқсанда әлеуметтік желіде Тараздағы Тұңғыш Президент саябағында өртеніп жатқан жаңа жылдық шыршаның видеосы тарап кетті, деп хабарлайды Orda.kz.

«31 желтоқсан күні сағат 08:29-да Тараз қаласындағы Төле би көшесіндегі жасанды шыршаның өртеніп жатқаны туралы хабарлама түсті. Өрт 08:34-те оқшауланып, 08:35-те сөндірілді» деп түсіндірді Жамбыл облысы Төтенше жағдайлар департаменті.

Өртті сөндіруге сегіз қызметкер мен екі техника шығарылды.

Қалалық полицияның мәліметінше, бүгін таңғы сағат 08:29-да бейнебақылау камераларына жаңа жылдық шыршаның өртенген сәті түсіп қалған.

«Жедел іс-шаралар нәтижесінде полицейлер 56 жастағы ер адамды ұстады. Күдікті кінәсін мойындап, уақытша ұстау изоляторына қамалды. Аталған факті бойынша ҚР Қылмыстық кодексінің 202-бабы (Бөтеннің мүлкін қасақана жою немесе бүлдіру) бойынша сотқа дейінгі тергеу басталды» деп хабарлады полициядағылар. 

Авторы: Исламбек Дастан