Таразда Құндыз бен Назгүлдің қамқоршысы балаларды мас болып ұрып-соққан

Апалы-сіңлілі Құндыз бен Назгүлді қамқорлығына алған әйел өзге де балаларды ұрып-соғып, шашынан жұлған, деп хабарлайды Orda.kz.

Қамқоршыдан жәбір көрген балалар өткен жылдың 29 желтоқсанында Зулфия Төленованың үстінен ұрып-соғу дерегі бойынша арыз түсірген. Қазіргі таңда оның үстінен қылмыстық іс қозғалды.

Бұл туралы журналист Руслан Өтепбай мәлімдеді. Балалар Зулфия Төленованың ішімдікке сылқия тойып алып, мазаларын қашыратынын және соққыға жығатынын айтқан.

«Аталған дерек бойынша қазіргі таңда тергеу амалдары жүргізіліп жатыр. Егер кінәсі дәлелденсе, заң аясында жауапқа тартылады» деп жазды журналист.

Зулфия Төленова ішімдікті тек той-жиындарда ғана ішетінін айтып ақталған. Бірақ Руслан Өтепбай қамқоршының мас жатқан фотосуреттерін жариялап үлгерді.

Айта кетейік, әлеуметтік желіде Құндыздың аянышты суреті тарағаннан кейін мән-жайды анықтау үшін Руслан Өтепбай Таразға арнайы барған.