Талғардағы кісі өлтіру мен бала ұрлау қылмысы: Учаскелік инспектордың үстінен іс қозғалды

Талғар ауданында кісі өлімі мен бала ұрлау оқиғасына байланысты учаскелік инспектор қызметінен босатылды. Ол екі бірдей бап бойынша айыпталып отыр, деп хабарлайды Orda.kz.

Алматы облысы прокуратурасының мәліметінше, учаскелік инспекторға қатысты екі бап, «абайсызда ауыр зардаптарға әкеп соққан салғырттық», «құқық қорғау органының қызметкері жасаған қызметтік жалғандық жасау» айыбы бойынша қылмыстық іс қозғалған. 

Прокуратура тергеудің аяқталғанын растады. Инспектор ішкі істер органдарынан 2025 жылдың 4 қарашасында, оқиғадан екі айдан аса уақыт өткен соң, жұмыстан шығарылды. 

Айта кетерлігі, 3 қыркүйекте, трагедиядан үш күн бұрын, учаскелік инспектор сол үйдегі әйел шақырған соң барады. Сол күні үйге мылтық ұстаған ер адам келген. Инспектор сол күні қорғау нұсқамасын рәсімдеп, оған жәбірленушінің жалған қолтаңбасын қойған. Сараптама бұл қолтаңбаның жәбірленушіге тиесілі емес екенін анықтады. 

Айта кетейік, бұған дейін Талғардағы қанды оқиғаға қатысты күдіктіге 12 бап бойынша айып тағылды.