Тайланд мейрамханасында шатасып үш миллион теңге төлеген адам іздестірілуде

Әйгілі мейрамхана қызметкерлері нақты есепшоттағы 2 000 баттың орнына абайсызда 200 000 баттан астам (үш миллион теңгеге жуық) аудара салған тұтынушыны іздеп жатыр, деп хабарлайды Orda.kz thethaiger.com сайтына сілтеме жасап.

Мейрамхана Facebook желісінде тұтынушыға арнап жазба жариялады:

«Біз кеше (3 қараша) Neua Luan Luan мейрамханасының Ratchaphruek филиалында кешкі сағат 19.50-де тамақтанған тұтынушыны іздейміз. Клиент 2хх ххх бат артық соманы аударды. Бұл хабарламаны көрсеңіз, бізге электрондық пошта арқылы немесе 095-527-8298 нөміріне қоңырау шалыңыз. Рақмет сізге!» деп жазды олар.

Пост аса қызығушылық тудырып, көптеген адамдар клиентті табуға көмектесу үшін онымен бөлісті. Кейбір қолданушылар бұл адам бай болғандықтан қатені байқамауы мүмкін деп те әзілдеді.

Басылымның мәліметінше, нақты есепшот 2 020,91 бат болған, бірақ клиент ақша аудару кезінде қателесіп 202 091 бат жіберген. Енді мейрамхана қызметкерлері банкке хабарласып, оның қызметі арқылы жағдайды шешуге тырысуда.