«Сыбайлас жемқорлық қазақстандықтардың мәдени кодексіне айналды»: қоғам қайраткерлері Тоқаевқа үндеу тастады

НеМолчи қоғамдық қоры Қазақстан президенті Қасым-Жомарт Тоқаевқа бұдан былай құқық қорғау органдарының көмегіне сене алмайтындарын айтып, үндеу жолдады.

Қоғамдық қор президенті Дина Смаилова олардың командасында төрт ерікті ғана жұмыс істейтінін айтты. Бес жыл бойы олар зорлық-зомбылық пен педофилиямен күресудің қиын процестерін шеше отырып, мемлекеттен жалақы мен грант алмаған. Олардың жабылып қалмауына әлеуметтік желілердегі жазылушылар көмектесіп жүр.

«Мен сізге елде болып жатқан барлық оқиғалардан үміт үзіп хат жазып отырмын! Сыбайлас жемқорлық деңгейі елді полицияның, прокурорлардың көмегіне, адвокаттар мен судьялардың адалдығы мен кәсібилігіне сенуге болмайтын деңгейге жеткізді. Елімізде қылмыстық істерді жабудың нақты белгіленген мөлшерлемесі бар. Қылмыстық істер қорлықпен жабылғандықтан, адамдар көмек сұрап, қорға барады. Күдіктілер жәбірленушілердің көзінше полициямен келіссөздер жүргізеді. Әрбір үндеуде полицияға қатысты осындай айыптар бар, адамдар әділдікке сенбейді» делінген хабарламада.

Қоғам белсенділері 5 жылда 120 зорлаушы мен педофилден тазартқанын мәлімдейді. Солардың арқасында 100-ден астам полиция қызметкері заң бұзушылықтары үшін тәртіптік жауапкершілікке тартылды. Сонымен қатар, зорлық-зомбылық құрбандары жылына 7 мыңнан 10 мыңға дейін тегін кеңес алады.

«Бірақ бүгінде жұмысымыз бәріміз үшін адам төзгісіз болып кетті. Біз зорлаушылармен, қорлаушылармен, педофилдермен емес, құқық қорғау органдарындағы жемқорлықпен күресіп жатырмыз. Полицейлер, прокурорлар, соттар қылмыскерлердің жауапкершіліктерін жойып жатқанда, біз, үлкендер, зорланған, азапталған, өлтірілген аналардың, балалардың құқықтарын қорғау үшін қалай күресеміз? Осы уақытта рақымшылық жарияланып, бұзақылардың көпшілігі жауапкершіліктен құтылып кетіп жатыр» деді қор өкілі.

Қоғам қайраткерлерінің айтуынша, сыбайлас жемқорлық ұлттың өзіндік сана-сезімін жойып, қазақстандықтардың мәдени кодына айналып барады.

«Сыбайлас жемқорлықты балалар мектепте үйренеді. Оларға бағаны сатып алуды үйретеді, содан кейін жоғары оқу орындарының дипломдарын сатып алады, артынша әкелері жылы орынды өзінің балаларына береді. Бұл туралы әр отбасы, әрбір қазақстандық біледі. Әртістер мен КВН ойыншылары бұл туралы өткір әзілдейді. Бірақ одан ештеңе өзгеріп жатқан жоқ» деп жазды белсенділер.

Үндеуде қоғам қайраткерлері үнсіз қалмай, күресті жалғастыратындарын алға тартты.