«Сұлтан Сүлеймен» телехикаясында басты рөлді сомдаған актер сотталды

Түркияның танымал актерлері, «Сұлтан Сүлеймен» телехикаясында басты рөлді ойнаған Халит Эргенч пен «Чукур» сериалы арқылы танылған Рыза Коджаоғлу сот үкімімен қылмыстық жауапкершілікке тартылды, деп хабарлайды Orda.kz.

Соттың шешіміне сәйкес, олар Стамбұлда өткен жаппай наразылық акцияларына қатысты іс бойынша жалған куәлік бергені үшін кінәлі деп танылған. Халит Эргенчке 1 жыл 10 ай 15 күн, ал Рыза Коджаоғлуға 1 жыл 8 ай бас бостандығынан айыру жазасы тағайындалды. Алайда, үкімнің орындалуы кейінге қалдырылған. Бұл жазаның кейін жеңілдетілуі немесе балама шарамен ауыстырылуы мүмкін деген сөз.

Істің толық мазмұны жария етілмегенімен, актерлер куәгер ретінде тергеліп, тергеу барысында жалған ақпарат бергені анықталған. Бұл оқиға 2013 жылы Гези саябағында басталған экологиялық наразылықтың аясында өрбіген үкіметке қарсы митингілерге байланысты.

Актерлерге қатысты үкім түрік қоғамында, әсіресе жанкүйерлер арасында үлкен резонанс тудырып, әлеуметтік желілерде кеңінен талқыланып жатыр. Көбі сот шешімін әділетсіз деп бағалап, сүйікті әртістерін қорғап жатыр.