Сорбұлақта жоғалған тікұшақтағы тағы бір адамның денесі табылды

Сорбұлақта жоғалған экипажды іздестіру барысында 12 тамыз күні тағы бір адамның мүрдесі табылды, деп хабарлайды Orda.kz.

Қорғаныс министрлігінің мәліметінше, табылған адам экипаж командирінің көмекшісі болған.

«12 тамыз күні экипаж командирінің көмекшісі, капитан Аман Нұрланұлы Амангелдінің денесі табылды. Тәжірибелі ұшқыш, күрделі метеорологиялық жағдайларда бірнеше мәрте ұшып жаттыққан. Түрлі ауқымдағы жаттығулар мен операцияларға қатысқан. Жоғары орындаушылық тәртібімен және мінсіз қызметтік беделімен ерекшеленген. EC-145 тікұшағындағы ұшу уақыты – 295 сағат» деп жазды Қорғаныс министрілігі. 

Қаза тапқан ұшқыштардың үшеуі де Әуе қорғанысы күштері әскери институтының түлегі. Қазақстан Республикасының Қорғаныс министрлігі мен Қарулы күштерінің басшылығы тарапынан қаза тапқандардың туыстары мен жақындарына барлық қажетті көмек көрсетіледі.

Еске сала кетейік, Түркістан облысында құтқарушылар 9 тамызда Алматы облысында жоғалған әскери тікұшақты іздестіру кезінде мәйітін тапқан әскери қызметші Нұржігіт Үйсінбаевты жерлеу рәсімі өткен болатын.