«Соңғы ерлік»: Ақтауда құлап бара жатқан ұшақтағыларды жұбатқан қыз

Әзірбайжандық БАҚ ұшақ апаты кезінде жолаушыларға нұсқау беріп, сабыр сақтауға шақырған бортсерік Хёкюма Алиеваның суретін жариялады. Тірі қалған жолаушылар дәл осы қыздың батылдығын атап өтіп, соңғы сәттерде тәртіп пен байсалдылықты сақтау үшін барын салғанын айтты, деп хабарлайды Orda.kz Report сайтына сілтеме жасап.

Хёкюма Алиеваның әкесі Жалил Алиев журналистерге AZAL әуе компаниясы өкілдері оған қоңырау шалып, көңіл айтқанын мәлімдеді.

«Қызым 2016 жылдан бері AZAL-да жұмыс істеді. Маған оның апатқа ұшыраған ұшақта болғанын айтты. Басқа ештеңе білмеймін», – деді ол.

Ал оның бауыры Джошгун Алиев апаттан аман қалғандар жеткізілген Қазақстандағы ауруханаларға хабарласқанын мәлімдеді. 

«Біз оның фотосуретін жіберіп, жарақат алғандар арасында бар-жоғын анықтауға тырыстық. Дәрігерлер кейбір жолаушылардың денесін қатты күйік шалғанын, сол себепті тұлғаны анықтау қиын екенін айтты. Біз үміт үзбейміз», – деді ол. 

Хёкюма Алиева 1991 жылы Кяльбаджар ауданында дүниеге келген. Ол тұрмыс құрған, бірақ балалары жоқ еді.

Апат 25 желтоқсан күні болды. AZAL әуе компаниясының Бакуден Грозныйға бағыт алған Embraer ұшағы Қазақстанның Ақтау қаласы маңында құлады. 38 адам қаза тауып, 29 адам жарақат алды. Әзірбайжан халқы 26 желтоқсан күнін апат құрбандарын еске алу үшін қаралы күн деп жариялады.

Соңғы сапарға аттанған ұшақ жайлы толық ақпаратты тілшіміздің мақаласынан оқыңыздар.