Солтүстікте орыс ұлтына тіл тигізіп екі жылға сотталған жүкті әйел босанды

«Ұлтараздықты қоздырды» деген айып тағылып, Солтүстік Қазақстанда 2 жылға сотталған 35 жастағы жүкті әйел босанып алды, деп хабарлайды Orda.kz.

Солтүстік Қазақстан облысы Ғабит Мүсірепов атындағы аудандық сот 35 жастағы Жансұлу Дархамбаеваны сот ұлтаралық араздық қоздырғаны үшін кінәлі деп танып, екі жылға бас бостандығынан айырған еді. Бүгін оның босанып алғаны белгілі болды. Бұл туралы белсенді, Солтүстік Қазақстанға қазақтарды көшіруге шақырып жүрген «Tauekel» ұйымының басшысы Бурахан Дақанов өзінің Facebook парақшасында жазба жариялады.

«Ал сүйінші ағайын, Солтүстіктегі Жансұлу Дархамбаева қарындасымыз дүниеге салмағы 4 келіден асатын батыр қыз әкеліпті. Екеуінің де жағдайы жақсы екен» деп жазды Бурахан Дақанов. 

Ол осы әйелдің мәселесі бойынша облыс басшылығымен сөйлескенін де айтты. Оның сөзіне қарасақ, алдағы апелляциялық сотта мәселе оң шешілуі мүмкін.

«Тағы айта кетейін,  ұлтараздық бабымен сотталған аяғы ауыр Жансұлу қарындасымыз жайлы облыс басшылығымен сөйлестім. Жағдайды бәрі бақылап отыр. Жансұлу қазір перзентхада. Бұйырса жақын арада аппеляциялық сот болады. Соған қарағанда жағдай оң шешілетін секілді...» деп жазды Дақанов. 

Айта кетейік, бұған дейін сот барысында Жансұлу кінәсін толық мойындап, әрекетіне өкінетінін айтқан. Ол сотта бұған дейінгі өмір жолын баяндап, мұндай әрекетке неліктен барғанын түсіндірген. Оның айтуынша, Сокологоровка ауылындағы мектепте жұмыс істеген кезінде орыс әріптестері тарапынан қысым көрген. Мектеп директоры мен ата-аналардың көзқарасы да өзгеріп, кейін ол жұмыстан шығарылған. 2024 жылы Урожайное ауылына көшіп барып, мектепке педагог-психолог болып орналасқан. Кейін директор болған. Мемлекеттік тілді мектепке енгізуге талпынған соң әріптестері мен шаруашылық меңгерушісі тарапынан қысым күшейгенін айтқан.

Еске сала кетсек, Orda.kz 35 жастағы жүкті келіншекке кесір тілігі жасалғалы жатқаны жайлы жазған болатын.