Шымкентте жеке қайырымдылық қоры оқушы қыздарды отбасынан заңсыз тартып алды

Шымкенттегі жекеменшік қайырымдылық мекемесінде 40-қа жуық мектеп жасындағы қыз ата-анасының қарауынсыз тұрып келген. Бұзушылықты Ұлттық қауіпсіздік комитеті мен прокуратура қызметкерлері анықтады, деп хабарлайды Orda.kz ақпарат агенттігі Otyrar.kz сайтына сілтеме жасап.

Кооперативті қайырымдылық қоры 28 отбасының қыздарын қамқорлыққа алған, олардың ата-анасы ешқандай қарсылық көрсете алмаған. Кейбір оқушы қыздар онда бірнеше ай, басқалары үш жылға дейін тұрып келген.

Мамандардың айтуынша, қор әділет органдарында ресми тіркелген, бірақ балалар мен жасөспірімдерді оқыту құқығы болмаған. Оның қызметін тексеру үшін арнайы комиссия құрылды.

«Бұл жағдайды мекеме басшылығы білген. Бұзушылықты анықтаған соң директор мен әкімшілікті қатаң жауапқа тарттық. Сондай-ақ оқу-тәрбие ісі жөніндегі орынбасарларының, ақпаратты жасырғаны үшін сынып жетекшілерінің жауапкершілігін де қарастырдық», – дейді Шымкент қалалық білім басқармасының бөлім басшысы Нұрдәулет Абылаев. 

Заң бұзушылық анықталған соң, қайырымдылық қорында тұратын 33 қыз уақытша оқшаулау және бейімдеу үшін қала орталығына жіберілді.

Олардың барлығы №24 мектепте білім алған.Оқушылардың отбасында тәрбиеленбейтінін мектеп әкімшілігі мен ұстаздары білгенімен, құзырлы органдарға хабар бермеген.

Қазір балаларын қараусыз қалдырған ата-аналардың да, шара қолданбаған мұғалімдердің де жауапкершілігі қарастырылуда.