Шымкентте келіншекті өлтіріп, мәйітін қоқыс маңына тастаған жасөспірімге жаза мерзімі ұзарды

Шымкент қалалық сотында қоғамды дүр сілкіндірген Диана Оңғарбаеваның өліміне қатысты қылмыстық істің апелляциялық сотының үкімі шықты. 26 жастағы келіншекті пышақтап өлтіріп, мәйітін қоқыс маңына жасырған жігіттің жаза мерзімі ұзарды, деп хабарлайды Orda.kz.       

17 жастағы бозбала бірінші сатыдағы сотта 7 жыл 6 айға бас бостандығынан айрылған еді. Бұған келіспеген жәбірленуші тарап апелляцияға беріп, ақыры үкім өзгерді.

«ҚК 99-бабы, 1-бөлігімен және 188-баптың 1-бөлігімен тағайындалған жазаны толық қосу арқылы түпкілікті 8 жыл 6 ай бас бостандығынан айыру жазасы тағайындалсын. Жәбірленуші Қарлығаш Оңғарбаеваға моральдық зиян өтемақысы ретінде 2 миллион теңгеден 5 миллион теңгеге дейін, Айдана Оңғарбаеваға 2 миллион теңгеден 5 миллион теңгеге дейін, Жаппаровтың пайдасына 6 миллион теңгеден 10 миллион теңгеге дейін ұлғайтылсын», — деп үкімді оқыды Шымкент қалалық соты қылмыстық істер жөніндегі сот алқасының төрағасы Бәйдібек Дүйсебеков. 

Судья заңда кәмелетке толмағандарға жаза мерзімін 7 жыл 6 айдан асыруға болмайтынын да тілге тиек етті. Сондықтан бірінші сатыдағы сотта ең жоғары жаза берілгенін де айтты.

«99 баптың 1-бөлігінде «Қасақана адам өлтіру» айыбын таққан. Сонымен қатар бірінші сатыдағы сот сотталғанды ҚР ҚК 314 бабының 1-бөлігі «өлген адамды қорлау» қылмысы бойынша ақтаған. Бірінші сатыдағы соттың жасаған қорытындысымен сот алқасы келіседі. Мәйітті қорлау болмаған. Ол қылмысын жасыру мақсатында адам көрмейтін, тасалау жерге алып барған. Осылардың барлығына сот алқасы баға бере отырып, түпкілікті тағайындалған 7 жыл 6 ай бас бостандығынан айыру жазасын жеңіл деп санап, ұрлық бойынша жазаны толық қостық», — деді Бәйдібек Дүйсебеков. 

Алайда, шыққан үкіммен марқұмның анасы мүлде келіспеді. Қызымның 26 жерінен пышақтап, мәйітін зорлады деген Қарлығаш Оңғарбаева бұл сұмдықты сотталушы тергеу кезінде мойындаған деп отыр. Бірақ, сот басталғанда алғашқы айтқанынан айнып, кінәсіне дәлел табылмапты. 

«Бұл үкімге келіспеймін. Әділетсіз. Сот мүлде әділ өткен жоқ. Сотталған бала кәмелетке толмаған деп барлық жағдайды жасап беріп отыр. Сонда кәмелетке толмаса, осындай қылмыс істей бере ме? Бала мәйітті зорлаған. Жыныстық қатынасқа түскен. Бала оны тергеуде мойындаған. Соның бәрін жоққа шығарып отыр енді. Бұл жерде бәрі ақшамен шешіліп жатыр деп ойлаймын. Тергеу басынан дұрыс жүргізілмеген. Шикіліктің барлығы содан кетті. Мен Жоғары сотқа жүгінемін», — деді жәбірленуші Қарлығаш Оңғарбаева. 

Еске салайық, былтыр тамызда Шымкенттегі қоқыс маңынан 10 күн бұрын жоғалған 26 жастағы келіншектің пакетке оралған мәйіті табылған еді. Желке тұсынан 10 рет пышақталған мәйіт 10 күн бойы далада жатқан.

Белгілі болғандай оны 16 жастағы жігіт үй тазалауға шақырып, артынша азаптап өлтірген. Айыптау актісінде сотталушы мәйітпен жыныстық қатынасқа түскені айтылған. Алайда, сот барысында бозбала бұл сөздерінен айнып, ақыры бұл бап алынып тасталды. Ол да қанды оқиға болған үйге құрылыс жұмыстарын істеуге барып, дәл сол күні жалғыз қалған екен. 10-сынып оқушысы марқұмның ұялы телефонын да сатып жіберген. 

Сотта дәл осы ұрлық ісіне жаза мерзімі толықтырылып, 8 жыл 6 айға ұзартылды. Ал, марқұм Диананың артында 2 қызы мен күйеуі қалды.

Авторы: Назерке Еркінбекқызы, Шымкент

Оқи отырыңыз:

• Қылмыстық іс қозғалды: Шымкентте көшенің қақ ортасында бір топ жас жігіт жаға жыртысты
• Шымкент қаласына жаңа прокурор тағайындалды
• Шымкентте 21 жастағы қызды өлтірген ер адамға іздеу салынды