Шымкентте депутат жалған көлік нөмірімен жүрген

Түркістан облысының мәслихат депутаты бірнеше жол ережесін бұзып, жалған көлік нөмірімен жүрген, деп хабарлайды Orda.kz.

Әлеуметтік желілерде «777» нөмірлі Lexus автокөлігінің жүргізушісі жолда ереже бұзған сәті түсірілген видео тарады. Көлік жүргізушісі қарсы жолаққа шығып, тоқтап, жолаушыны түсіріп кеткен. Қозғалыс барысында жүргізуші де, жолаушы да белдік тақпаған. Оқырмандардың айтуынша, жүргізуші AMANAT партиясының мәслихат депутаты Ерғали Аманбаев.

Тексеру нәтижесінде ол ҚР ӘҚБтК-нің бірнеше бабы бойынша әкімшілік жауапкершілікке тартылды.

«Жалған тіркеу нөмірлері бар көлік құралын басқару, қарсы жолақпен жүру, міндетті сақтандырудың болмауы, қауіпсіздік белдігін тақпау, тыйым салынған орындарда кері жүру, сондай-ақ қозғалыс алдындағы сигнал беру талабын орындамау»,  деп хабарлады қала полициясы.

Құқық бұзушының көлігі айыппұл тұрағына қойылды.