Шымкентте бұрынғы депутатқа екінші рет іздеу жарияланды

Шымкент тұрғыны бұрынғы мәслихат депутаты Қуаныш Дәулетәлиевті сотқа берді. Оның айтуынша, экс-депутат алдында балағаттап, қорқытқан, деп хабарлайды Orda.kz Otyrar порталына сілтеме жасап.

Ескендір Жамбаевтың айтуынша, Дәулетәлиев оны жеке емес, дүйім жұрттың алдында қорлаған және қорқытқан.

«Ол мені кемсітіп, балағат сөздер айтты. Мүмкін, ол кек қайтарғысы келетін шығар. Себебі мен бұған дейін оның ұлдарына қатысты шағым жазғанмын. Кейін олар алаяқтық үшін сотталды», — дейді Ескендір Жамбаев.

Экс-депутат сотқа келмегендіктен, оған іздеу жарияланды.

«Сотталушы сотқа келмегендіктен және оның келмеу себебі анықталмағандықтан, сот іс жүргізуді тоқтатып, оған іздеу жариялайды», — деді судья Асхат Есенов.

Бұл – Қуаныш Дәулетәлиевке іздеу жарияланған алғашқы жағдай емес. Қыркүйек айында да ол сот отырысына келмей қойған. Сол кезде полиция оны тауып, мәжбүрлеп сотқа жеткізген болатын.

Дәулетәлиев 48 жаста. 2000 жылдан 2009 жылға дейін кәсіпкерлікпен айналысқан. Кейін алты жыл бойы «Сенім-Құрылыс» ЖШС-інде коммерциялық істер жөніндегі директордың орынбасары болған. 2015 жылдан бастап осыған ұқсас қызметті «БОИНИС КС» ЖШС-де атқарған. Сондай-ақ Шымкент қалалық мәслихатында «Ауыл» партиясы фракциясын басқарған.