Шерзаттың соты: Сот жалған куәлік берді деген екі куәгер қызға қатысты жеке қаулы шығарды

Шерзат Полаттың сотында негізгі куәгерлер санатында болған, яғни төбелестің басы-қасында болған Эльмира Нұрбекова мен Дана Жақсыгелдінің алдын ала тергеп тексеру мен соттағы жауаптарындағы қарама-қайшылықтарға қатысты прокурор мен жәбірленуші тараптың жеке қаулы шығаруға байланысты уәждеріне қатысты судья шешімін айтты, деп хабарлайды Orda.kz.

Судья Ержан Жанұзақов куәгерлер Эльмира Нұрбекова, Дана Жақсыгелді, Арлан Қазыкенов және Юлдаш Розыбақиевке қатысты жеке шешім шығару жөніндегі өтінішіне байланысты қаулыны жария етті.

Қаулы бойынша Алматы облысының поркуратурасына жолдады. Куәгерлердің қылмыс белгілері болуы мүмкін екенін атап өтіп, бұл мәселеге прокурордың назарын аударды.

Еске салсақ, алдынғы сот отырыстарында Мейірман Шекеев осы куәгер екі қызға қатысты сотта «қасақана көрінеу жалған ақпарат бергені» үшін жеке қаулы шығаруды сұрады. 

Куәгер Эльмира Нұрбекова мен Дана Жақсыгелдінің іс-әрекеттерінде қылмыстық кодексінде 421-бабы 2-ші бөлігіне сәйкес «аса ауыр қылмыс бойынша тергеуде көрінеу жалған ақпарат беру» мен 431-бапқа сәйкес «жасалған қылмысты хабарламау» бойынша қылмыстық құқық бұзушылық бар деп жеке қаулы шығаруды сұраған еді.

Сондай-ақ прокурор Эльмира Нұрбекова мен Дана Жақсыгелдіге қатысты жеке шешім шығаруды сұрады.

«Олардың әрекеттеріне құқықтық баға беру үшін тексеру жүргізу қажет. Сонымен қатар бұл шешімді Алматы облыстық полиция департаментіне жолдау керек», – деді Дана Сәрсенбай.

Прокуратура дәл осындай шешімді куәгерлер Арлан Қазыкенов пен Юлдаш Розыбақиевке қатысты да шығаруды сұраған.