Шерзат ісіне қатысты алғашқы сот отырысы бүгін басталады

Бүгін, 10 сәуір күні, сағат 12:00-де Талғарда кісі қолынан қаза тапқан Шерзат Болаттың ісіне қатысты алдын ала тыңдау бойынша ашық сот отырысы басталады, деп хабарлайды Orda.kz.

Сот отырысы Талдықорғанда орналасқан Жетісу облысының қылмыстық істер жөніндегі мамандандырылған ауданаралық сотының ғимаратында өтеді.

Соттың Талдықорғанда өтуінің себебін Шерзаттың отбасының адвокаты Мейірман Шекеев күдіктілердің көбісі осы Талдықорғандағы уақытша ұстау изоляторында отырғандығымен түсіндірді.

Соттың басталуына 1,5 сағат қалды. Журналистер тіркелуде, мамандандырылған ауданаралық сот қызметкерлері журналистер үшін жеке бөлме дайындалғанын айтты.  Алайда, БАҚ өкілдері сот залында тікелей қатыса ала ма — әзірше белгісіз. Барлығы судьяның шешімі мен тараптардың пікіріне байланысты, себебі іс бойынша кәмелетке толмаған адам бар.

«Қазір біз залға кіруге рұқсат беру туралы шешімді күтіп отырмыз», — деп хабарлайды Orda.kz тілшіcі.

Сот ғимаратының маңында қазір белсенділік байқалады: күзет қызметі кезекшілік етуде, полиция қызметкерлері әр жерде жүр. Сонымен қатар, жақын жерде Жеңіс күніне арналған репетициялар өтіп жатқан сияқты — әскери дайындыққа қатысты бұйрықтар естіледі. Жақында сот алдына жедел жәрдем көлігі келіп тоқтады.