«Сені де, сенің отбасыңды да өлтіреміз»

Бұған дейін «орыс ұлты туралы рэп оқыған» Мария Кочнева өзіне тергеуші хабарласып, Алматыдағы Алмалы аудандық полиция бөліміне шақырғанын айтты.

Бұл туралы «Медиазона» хабарлады.

Мария Кочневаға полиция нақты кім ретінде шақырғанын айтпағанын, оның үстіне тек «түсініктеме беру» қажет дегенін айтты. Оның айтуынша, шақыру қағазы да келмеген.

Сондай-ақ, белсенді өзіне және оның туыстарына қоқан-лоққы көрсеткен хабарламалар келе бастағанын айтты.

 «Олар мені өлтіреміз деп қорлайтын сөздер жазды. Менің бейнежазбамды анам мен достарыма жіберді. Мені «рейд» тобына қосты. Олар нашақорларды, ЛГБТ өкілдерін және киімдерінде американдық жолақтары бар адамдарды тауып, ұрып-соғады», – дейді Мария Кочнева.

Ол Азаттық тілшісіне ер адамның дауысы қоқан-лоққы көрсеткен дауыстық хабарламаны көрсетті. Дауыстық хабарламада қоқан-лоққы көрсетуші «сен бәріне жауап бересің», «сен азап шегесің», «сені де, отбасыңды да өлтіреміз», «сені тірідей көмеміз» деген сөздер айтты.

Мария Кочнева осы оқиғадан кейін полицияға арыз жазуға ниетті екенін айтты. 

Еске сала кетейік, Мария Кочнева — бұған дейін де белсенді болып шерулерге қатысты. Сондай-ақ, ол Qushtar атты әйелдердің құқығын қорғайтын қозғалыстың мүшесі.