Сәтбаевтағы қыз баланы қағып кеткен жүргізуші қамауға алынды

Бірнеше күн бұрын біз Ұлытау облысында 13 жастағы қыз баланың қазасына себеп болған жол апаты туралы жазған едік. Orda.kz мәліметінше, кінәсін толық мойындаған жүргізуші қамауға алынды, бұл туралы Ұлытау облысының соты хабарлады.

Қайғылы оқиға 16 маусым күні Сәтбаев қаласында «Мал базарының»  алдында болған. Toyota Camry автокөлігінің жүргізушісі жолды «рұқсат етілмеген жерден» кесіп өтпек болған қыз баланы қағып кеткен. Осы сәтте қарсы бағытта келе жатқан Lada Priora көлігі де жасөспірімді соққан. Қыз ауыр жарақат алып, жедел жәрдем келгенше оқиға орнында көз жұмды.

Аталған жол-көлік оқиғасы бойынша қылмыстық іс қозғалды.

«Сот отырысы барысында күдікті кінәсін толық мойындап, жасаған ісіне шын жүректен өкініш білдірді. Ұлытау облысының соты күдіктіге екі ай мерзімге қамауға алу түріндегі бұлтартпау шарасын қолданды»,  деп хабарлады сот. 

Қаулы заңды күшіне енген жоқ.

Бұған дейін апаттан кейін жол жөндеу жұмыстары талаптарын орындамағаны, атап айтқанда тиісті жол белгілері мен сызықтарының болмағаны үшін Сәтбаев қаласы әкімінің орынбасары жауапкершілікке тартылғаны хабарланды.