Сара Назарбаева дүниеден озды

Қазақстанның бұрынғы бірінші ханымы Сара Назарбаева Алматыдағы ауруханада жан тапсырды.

Orda.kz дереккөздері ақпараты бойынша, экс-президент Нұрсұлтан Назарбаевтың бұрынғы әйелі Сара Назарбаеваның өмірін қамтамасыз етіп тұрған аппарат сөндірілді. Сара Назарбаева 85 жасында дүниеден өтті. Алайда бұл ақпарат әзірге ресми түрде расталған жоқ.

Қазақстанның экс-президенті Нұрсұлтан Назарбаевтың туыстары Orda.kz тілшілерінің сауалына қысқа ғана «Иманды болсын» деп жауап берді.

Назарбаева Алматы қаласындағы Президент іс басқармасы медициналық орталығына қарасты Ұлттық госпитальда ауыр халде жатып, емделген еді.

Соңғы апталарда Сара Алпысқызы Алматыдағы Президент іс басқармасының қарамағындағы республикалық клиникалық ауруханада, халық арасында «Совминка» аталып кеткен мекемеде ем алып жатқан. Бүгін алдын ала мәліметтер бойынша, оны жасанды тыныс алу аппаратынан ажырату туралы шешім қабылданған.

«Совминкадағы» жағдай

Қазір «Орда» тілшілері осы аурухана ғимаратының жанында жүр. Аурухана маңында күзет күшейтілген. Қақпаның алдында қара костюм киген ер адамдар күзетте тұр, жеке қауіпсіздік қызметі де көбейген.

«Қоғамдық тәртіпті сақтау үшін ғана күзет күшейтілді», — деді сол жердегі полицейлердің бірі.

Бұрын бұл аумаққа еркін кіріп-шығуға болатын. Қазір жол жабылып, аумаққа жаңа қоршау орнатылғанын журналистеріміз байқады.

Сара Алпысқызы Назарбаева — 1941 жылы 12 ақпанда Қарағанды облысының Қызыл-Жар ауылында дүниеге келген. Қазақстанның бірінші ханымы тәуелсіздік алған күннен бастап 2019 жылға дейін осы ресми мәртебені иеленді.

2023 жылдың желтоқсанында жарық көрген мемуарларда Сара Алпысқызының жұбайы Нұрсұлтан Назарбаев: «Сара – жалғыз жарым емес» деп мәлімдеген еді. Ол Әсел Исабаевамен неке қиғанын да жасырмады. Дәл сол жылы Сара Назарбаева өзінің қыз күніндегі Қонақай тегіне ауысты. 

Сара Алпысқызы республикалық «Бөбек» балалар қайырымдылық қорының негізін қалаушы және президенті, сондай-ақ «SOS — Қазақстанның балалар ауылдары» қорының президенті (австриялық SOS Kinderdorf International ұйымының филиалы). Осы балалар ауылдарының түлектерінің бірі — Рафаэль Гасанов Сара Назарбаева туралы өте жылы пікір айтқан.

Сара Назарбаева Қазақстанда «Өзін-өзі тану» атты білім беру жобасын ойлап тауып, іске қосты. 2001 жылы бұл бағдарлама мектептерде сынақ ретінде енгізілді. 2010 жылға қарай пән 184 оқу орнында оқытылды, ал 2011 оқу жылынан бастап міндетті пән ретінде енгізілді. Алайда 2022 жылы билік бұл пәнді таңдаулы (факультативті) ету туралы шешім қабылдады.