Салық кодексі жобасындағы ақша аударымдарына қосылатын салық халықтың мойнына ілінеді

ҚР Ұлттық экономика министрлігі Салық кодексі жобасына барлық төлем операцияларына құн салығы қосылатын норма енгізуде, деп хабарлайды Orda.kz.

Мәжіліс депутаты Асхат Аймағамбетов Facebook парақшасында Экономика министрлігінің жоспарларына қатысты пікір білдірді.

Депутаттың айтуынша, пластикалық карталарға қызмет көрсету, картадан картаға, шоттан шотқа аудару, аударымдар мен банк қызметтері айтарлықтай қымбаттауы мүмкін.

«Мысалы, мен картадан картаға аудардым – комиссия 150 теңге болды. Бірақ егер Салық кодексінің жаңа жобасында ұсынылған норма қабылданса, мұндай аударымдар 12 пайызға дейін қымбаттауы мүмкін», - деді ол.

Асхат Аймағамбетов ҰЭМ-нің жаңа бастамасы, ең алдымен, қарапайым қазақстандықтардың мойнына түседі деп есептейді.

«ҰЭМ өкілдері бұл шығындарды банктер өздері өтейді деп мәлімдейді, бірақ шынын айту керек – бұл аңыз. Банктер клиент арқылы шығындарды өтеу мүмкіндігін ешқашан жіберіп қоймайды. Бұл қайырымдылық емес.
Бұл нормаға Ұлттық банк, Қаржыгерлер қауымдастығы, сарапшылар, тіпті «Атамекен» де жұмыс тобында қарсы шықты. Дегенмен, Экономика министрлігі оны бәрібір кодекс жобасына енгізді», — деді Аймағамбетов.

Оның пікірінше, «мұндай өзгерістер біздің шығындарымызды арттырып қана қоймай, қаржы жүйесіне деген сенімді әлсіретеді». 

«Бұл бастама барлығына әсер етеді. Біз бұл ережені өзгерту үшін түзетулер енгізуді ұсындық. Осы салықтарды қарапайым халықтың иығына іліп қою қаншалықты әділетті деп ойлайсыз?», -  деп сұрайды депутат. 

Асхат Аймағамбетов «бюджет тапшылығы мәселесін бірінші кезектегі емес шығыстарды қысқарту, бюджетті ұтымды пайдалану, жеңілдіктерді алып тастау және артық кіріс алатын аймақтарға салықты арттыру, банктердің КТС-н арттыру арқылы шешу керек» деп санайды.