Руслан Берденов Шымкент қаласы әкімінің орынбасары қызметінен кетті

Руслан Берденов Шымкент қаласы әкімінің орынбасары қызметінен кетті, деп хабарлайды Orda.kz.

Ол 2025 жылдың ақпан айынан бері қала әкімінің орынбасары қызметін атқарды. Оған дейін Мәжіліс депутаты болды. Оның қызметтен кеткенін Шымкент қалалық әкімдігі хабарлады.

«Руслан Берденов өзінің өтініші бойынша Шымкент қаласы әкімінің орынбасары қызметінен кетті. Ол бұл қызметті биылғы жылдың ақпан айынан бері атқарып келген», — деп жазды әкімдіктің баспасөз қызметі. 

Айта кетейік, көктемде оған әкімдіктің қасында шабуыл жасалды. 20 тамызда сот Берденовке бес рет оқ атқан Ернар Жиенбайды кінәлі деп танып, 9 жылға бас бостандығынан айырды.

Руслан Берденов 1985 жылдың наурыз айында Шымкент қаласында дүниеге келген. Әл-Фараби атындағы Қазақ ұлттық университетін және КИМЭП университетін «Іскерлік басқару магистрі, қаржылық менеджмент маманы» мамандығы бойынша тәмамдаған. Еңбек жолын 2007 жылы «Procter & Gamble LLP» компаниясында бастаған. 2010-2012 жылдары «EASTCOMTRANS» ЖШС-нің жылжымалы құрамды жалға беру департаментінің директоры, 2012-2018 жылдары «Ақ ниет» ЖШС-нің бас директоры, 2018-2019 жылдары «Ақ ниет» ЖШС-нің бақылау кеңесінің мүшесі, 2019-2023 жылдары «Aq Niet Group» бақылау кеңесі төрағасының орынбасары қызметтерін атқарды. 2023 жылдың наурызынан қала әкімінің орынбасары болып тағайындалғанға дейін Қазақстан Республикасы Парламенті VIII шақырылымының депутаты, Қаржы және бюджет комитетінің мүшесі болды.