Рудныйда Украина және Қазақстан туларының түстеріне боянған «Масленица қуыршағы» өртеді

Украина және Қазақстан туларының түстеріне боялған дәстүрлі қуыршақ Қостанай облысы Рудный қаласының орталығында өртенді, деп хабарлайды Orda.kz.

Масленица мерекесі кезінде дәстүрлі қуыршақ көк және сары түсті киім киген. Оқиға орнынан түсірілген бейнежазба әлеуметтік желілерде тез тарап, қоғамда үлкен резонанс тудырды.

Оқиғаға қатысты құқық қорғаушы, «Либерти» қоғамдық қорының президенті Ғалым Ақелеуов бұл жағдай Қазақстандағы идеологиялық жұмыстың толық күйреуін көрсететінін мәлімдеді.

«Рудныйда көк-сары түстерде қуыршақ өртенді – бұл Қазақстан мен тәуелсіз Украина туының түстері. Бұл қалада басқа түстер табылмаған сияқты. Біз «қазіргі» және «тәуелсіз» Қазақстанның идеологиясының толық күйреуі туралы айтуға болады. Ресейшіл империялық көзқарастар өз жемісін беруде – телеарна мен жергілікті билік ресми идеологтарды оңай жеңіп шықты. Бұл кездейсоқтық па? Жоқ, олай ойламаймын. Себебі көк аспан мен күннің түстері тікелей көктемнің келуімен байланысты, ал оны шығарып салумен емес», – деді ол.

Журналист Серғали Балажанның айтуынша, қуыршақ өртеуге ондаған, тіпті жүздеген адам қатысқан.

«Онсыз да бүкіл әлем жабылып соғысты тоқтата алмай отырғанда, рудныйлықтардың бұл әрекеті нағыз арандатушылық! Тағы бір айта кететін жайт, Рудный әкімі украин ұлтының өкілі. Ол өте іскер маман. Бірақ осы әрекеттің астарында мазақтау бар ма?» деп жазды ол әлеуметтік желіде.

Балажанның пікірінше, кез келген өркениетті елде осындай оқиғадан кейін аймақтағы идеологияға жауапты шенеуніктер жауапқа тартылуы тиіс.

Orda.kz редакциясы осы жағдай бойынша Қостанай облысының әкімдігіне сауал жолдады.