Ресей елшілігі адыраспанға қатысты Қазақстан тұрғындарына күтпеген үндеу жасады

Қазақстандықтарға адыраспанды Ресей аумағына алып кіруге тыйым салынды. Бұл үшін Ресей Федерациясы айыппұл салады, деп хабарлайды Orda.kz.

Ресей Федерациясының Қазақстандағы елшілігі Қазақстан азаматтарына елімізде адыраспан деп аталатын гармала өсімдігін Ресейге әкелуге тыйым салынғанын еске салды.

Гармала және оның құрамындағы гармин заты Ресейде есірткі ретінде танылған. Сондықтан оны әкелуге, сатып алуға, сақтауға, жөнелтуге, өсіруге, сатуға, таратуға, қолдануға, тіпті  пайдалануға үгіттеуге тыйым салынған.

Ресей Федерациясынан тыс жерлерде гармала кептірілген бұта, өсімдік бөліктері, сығымдалған брикеттер мен пирамидалар түрінде сатылады. Гармаланы қолданғаны немесе заңсыз айналымы үшін айыппұл, әкімшілік қамау түріндегі жаза қолданылуы мүмкін.

Егер өсімдік көлемі ірі болса, құқық бұзушы бірнеше жылдан өмір бойына дейін бас бостандығынан айырылып, сондай-ақ 1 млн рубльге дейін (6,6 млн теңге) айыппұл төлеуі мүмкін.

Айта кетейік, Қазақстанда заңсыз ойын бизнесін ұйымдастырған АҚШ пен Украина азаматтарына іздеу салынды.