Путин Ақтау маңында AZAL ұшағының құлауына ресейлік әуе қорғанысы себеп болғанын мойындады

Ресей президенті Владимир Путин Әзірбайжан басшысы Ильхам Әлиевпен кездесуде алдымен Ақтауда құлаған AZAL ұшағының апаты жайлы сөз қозғады, деп хабарлайды Orda.kz.

Путин апат Ресей әуе кеңістігінде болғанын еске салып, осы қайғылы жағдай үшін кешірім сұрады. Ол сондай-ақ қаза тапқандардың отбасыларына көңіл айтты.

Ресей президенті трагедия болған күні ресейлік әуе кеңістігін үш украиндық дрон кесіп өткенін және оларды Ресей әскерилері бақылап отырғанын айтты.

«AZAL экипажына Махачкалада қону ұсынылған, алайда олар өздерінің базалық әуежайына қарай ұшуды жалғастыруды шешкен», — деді Путин кездесуде.

Путиннің сөзінше, Ресейдің әуе шабуылына қарсы қорғаныс жүйесінен ұшырылған екі зымыран AZAL ұшағына тура соқпаған, бірақ бірнеше метр қашықтықта жарылған.

Апат 25 желтоқсан күні болды. AZAL әуе компаниясының Бакуден Грозныйға бет алған Embraer ұшағы Қазақстанның Ақтау қаласы маңында құлады. 38 адам қаза тауып, 29 адам жарақат алды. Әзірбайжан халқы 26 желтоқсан күнін апат құрбандарын еске алу үшін қаралы күн деп жариялады.

Соңғы сапарға аттанған ұшақ жайлы толық ақпаратты тілшіміздің мақаласынан оқыңыздар.