Прокуратура қандасты Қазақстаннан шығаруға жол бермеді

Маңғыстау облысы бойынша қадағалау органының баспасөз қызметінің мәліметінше прокуратура қандастың Қазақстаннан шығарылуына рұқсат бермеді, деп хабарлайды Orda.kz.       

Ақтау қаласының әкімшілік құқық бұзушылық істері жөніндегі мамандандырылған сотының қаулысымен Өзбекстан Республикасының азаматы Н.Қибасовты тіркеу мерзімі өтіп, елден кетуден жалтарғаны үшін ҚР ӘҚБтК-нің 517-бабының 4-бөлігі бойынша әкімшілік жауапкершілікке тартылған.  

Оған Қазақстан Республикасынан шығарып жіберу түріндегі жаза берілген. Қолданыстағы заңнамаға сәйкес, сот шешімімен шығарылған адам Қазақстан Республикасының аумағына бес жыл бойы кіре алмайды. 

«Сонымен бірге, облыс прокуратурасы Н.Қибасовтың «кандас» мәртебесін алуына және Қазақстан азаматтығын алу үшін құжаттарды дайындауына байланысты жазаны жеңілдету туралы кассациялық наразылық келтіру туралы Бас прокуратураға ұсыныс енгізді» делінген мәлімдемеде.

Бас прокуратураның наразылығымен Жоғарғы сот аталған сот шешімінің күшін жойып, істі жаңадан сот талқылауына жіберді.

«Соттың жаңа қарауы бойынша Н.Қибасовқа Қазақстан Республикасынан шығарылмай, айыппұл салынды» делінген хабарламада.