Президент кеңесшісі Атырау мұнай өңдеу зауытындағы жағдай туралы айтты

Астанада өтіп жатқан инвесторлар форумында «Қазақстанның мұнай-газ секторындағы инвестициялық мүмкіндіктер» атты сессия аясында ҚР Президентінің кеңесшісі, бұрынғы энергетика министрі Болат Ақшолақов Атырау мұнай өңдеу зауытындағы жағдайға қатысты пікір білдірді, деп хабарлайды Orda.kz. 

Президенттің кеңесшісі мұнай өңдеу зауыттарындағы жөндеу жұмыстарына бақылауды күшейту және мемлекеттік сатып алу жүйесін жетілдіру жоспарлары туралы айтты.

Оның айтуынша, жөндеу мәселесі тек Атырау мұнай өңдеу зауытына ғана емес, бүкіл салаға қатысты. Үш ірі зауыттың екеуі толықтай «ҚазМұнайГаз» компаниясына тиесілі болса, Шымкент мұнай өңдеу зауытының 50 пайыз үлесі де оған тиесілі.

«Әрине, бұл жерде жөндеу жұмыстарының сапасы туралы мәселе меншік иесіне қатысты. Ал жұмыс сапасы техникаға ғана емес, инженерлердің деңгейіне де байланысты», - деді Ақшолақов. 

Бұрынғы министр бұл корпоративтік мәселе деп есептейді, себебі жөндеу жұмыстарының сапасы мердігер міндетіне жатады.

«Егер жұмысты жеңілдету үшін бірдеңе қажет болса, мысалы, шұғыл жағдай болып, кенеттен мәселе туындаса, кәсіпорындар қажетсіз бюрократиясыз шығын материалдарын тез сатып алуы керек. Бүгінде мұндай күтпеген жағдайлар үшін сатып алудың жеңілдетілген тетігі бар», - деп қосты Ақшолақов. 

Жоспарлы жөндеу жұмыстарын жүргізген жағдайда «Самұрық-Қазына» қорының сатып алу ережелері қолданылады. Барлық бөлімдер үшін сатып алу осы ережелерге сәйкес жүзеге асырылады. Бірақ бұл қатып қалған дүние емес: уақыт өте келе ережелер өзгереді, әртүрлі ұсыныстар түседі, бұл процесті оңтайландыру жүріп жатыр.

Дегенмен Атырау мұнай өңдеу зауытында түсініксіз жағдайлар мен келеңсіздіктер толастар емес.