Премьер-министр қызметіне Олжас Бектеновтің кандидатурасы ұсынылды

Президент Қасым-Жомарт Тоқаевқа Amanat партиясының атынан премьер-министрдің кандидатурасы ұсынылды.

Ақорданың хабарлауынша, президент Тоқаевқа парламент мәжілісінің және Amanat партиясының төрағасы Ерлан Қошанов премьер-министр қызметіне Олжас Бектеновтің кандидатурасын ұсынды. 

«Қолданыстағы заңнамаға сәйкес, мемлекет басшысы ұсынылған кандидатураны мәжілістегі партиялардың фракцияларымен жуық арада талқылайды» делінген хабарламада. 

Еске салайық, кеше, 5 ақпанда үкімет қызметін доғарды. Премьер-министр қызметін уақытша атқару Роман Склярға жүктелді. 

Ал үкіметтің өзге мүшелері жаңа құрам бекітілгенге дейін өз міндетін орындай береді.

Бүгін, 6 ақпанда сағат 15:00-де президент Қасым-Жомарт Тоқаев парламент мәжілісінің пленарлық отырысына қатысады. Онда депутаттардың келісімін алу үшін жаңа премьер-министрдің кандидатурасы ұсынылады.