«Полиция басшылығы жемқор»: ІІМ Маңғыстау полициясын аяғынан тік тұрғызды

Ақтауда бүгін құқық қорғау органдарының жұмысына қысым жасалған жағдай болды. Өңірге ІІМ-нің арнайы комиссиясы шұғыл жетті, деп хабарлайды Orda.kz.

Тексерудің себебі — желіде тараған анонимді хат. Белгісіз авторлар Маңғыстау облыстық полиция департаменті басшылығын бюджет қаржысын жүйелі түрде жымқыруға қатысы бар деп айыптайды.

«Департамент басшысы Сағындық Аяғанов сыбайластары арқылы мемлекет бөлген қаржыны өздеріне аударып, жалған сатып алуларды рәсімдейді, тендерлерде алдын-ала келісілген компаниялардың жеңуін қамтамасыз етеді. Жұмыс істелмесе де, актілерге қол қоюға мәжбүрлейді» деп жазылған анонимді хабарламада. 

Хат авторлары жүздеген миллион теңгенің ұрланғанын айтып, президенттен тексеру бастауды сұраған. Бұл ақпарат өңірдегі құқық қорғау жүйесінде айтарлықтай дүрбелең тудырып, әлеуметтік желіде қызу талқыланды. Пікір қалдырушылар: «жел соқпаса, шөптің басы қимылдамайды» дейді.

Алайда полиция департаменті тексеруге Сағындық Аяғановтың өзі бастамашылық еткенін айтты.

«Департамент басшысы анонимді хатта көрсетілген мәліметтерді тексеру үшін ІІМ мен тиісті органдарға өзі хат жолдады»,  деп хабарлады ведомство. 

Сонымен бірге ол комиссия құрамына мәслихат депутаттары мен қоғам өкілдерін тартуды ұсынған. Бұл, ведомствоның айтуынша, процестің ашық әрі объективті өтуін қамтамасыз етуі тиіс.

Енді комиссияның міндеті — жарияланған айыптаулардың негізі бар-жоғын анықтау.