Перизат Қайратқа қатысты сот басталды

Астанада «Biz Birgemiz Qazaqstan 2030» қорының басшысы Перизат Қайрат пен оның анасы Ғайни Алашбаеваға қатысты қылмыстық іс бойынша сот процесі басталды, деп хабарлайды Orda.kz.

Соттың баспасөз қызметінің мәліметінше, бүгін алдын ала тыңдаулар өтіп жатыр.

Айыпталушылар БАҚ өкілдерінің сот отырысына қатысуына қарсы екенін мәлімдеп, фото және видео түсіруге рұқсат бермеді.

Тергеу мәліметінше, Перизат Қайратқа су тасқынынан зардап шеккен қазақстандықтар мен қақтығыстан зардап шеккен палестиналықтарға көмек ретінде жиналған 3,5 млрд теңге көлеміндегі қаражатты жымқырды деген айып тағылып отыр.

Бұл іске Перизаттың анасы Ғайни Алашбаева да тартылған. Оған алаяқтық және қылмыстық жолмен алынған кірістерді заңдастыру баптары бойынша айып тағылған.

Тергеу нұсқасы бойынша, Перизат Қайрат миллиардтан астам теңгені қолма-қол ақшаға айналдырып, жеке қажеттіліктеріне жұмсаған. Қаражат жөндеу, жиһаз, жол жүру және киім-кешек шығындарына кеткен. Солардың арасында 6,9 млн теңгеге сатып алынған Rolex сағаты да бар.