Перизат Қайрат сотында Головкиннің 10 млн теңгеге сатылған қолғаптары сөз болды

Астанада Перизат Қайратқа қатысты сот отырысында MM Group құрылыс компаниясының негізін қалаушы Мөлдір Сүйіншәлі куәлік берді, деп хабарлайды Orda.kz.

Оның айтуынша, 2021 жылы Перизат Қайрат оны мүгедектігі бар балаларға арналған оңалту орталығын салуға қаржылай қолдау көрсету мақсатында ұйымдастырылған қайырымдылық кешіне шақырған.

«Бізге жиналған қаражаттың барлығы ерекше қажеттілігі бар балаларға арналған орталықтың құрылысына жұмсалатыны айтылды. Сол кеште өткен аукционда мен Геннадий Головкиннің қолғаптарын 10 миллион теңгеге сатып алдым. Ақшаны ресми түрде қордың есепшотына аудардық. Жобаға ешқандай күмәнданбадым. Бұл қорды жаңалықтардан көріп, мемлекеттік ұйым деп ойладым», – деді кәсіпкер.

Сотта Перизат Қайраттың қорғаушысы жәбірленушінің еш шағым айтуға негізі жоқ екенін мәлімдеді. Оның сөзінше, Мөлдір Сүйіншәлі аукционда қолғапты алған, яғни, өзі қалаған затын иеленген.

Бірақ Мөлдір Сүйіншәлі бұл қаржыны қайырымдылық мақсатта аударғанын айтып, азаматтық талабынан бас тартпайтынын мәлімдеді.

«Егер ол орталық шынымен салынса – менде ешқандай сұрақ туындамайды. Бірақ ақша діттеген жеріне жетпесе, мен оның қайтарылғанын қалаймын», – деді ол.

Еске салсақ, бұған дейін қайырымдылық қорына жиналған қаражатты жымқырды деп айыпталған Перизат Қайрат өзіне тағылған айыпты жоққа шығарып, Алматының бұрынғы әкімі Бауыржан Байбекті сотқа шақырып, одан жауап алуды талап етті.