Павлодардағы анасы терезеден лақтырған бір жарым жасар бала көз жұмды

Павлодар облыстық балалар ауруханасында терезеден лақтырылып, ауыр жарақат алған бір жарым жасар бала қайтыс болды, деп хабарлайды Orda.kz irbistv.kz сайтына сілтеме жасап.

Дәрігерлер бірнеше күн бойы ауыр жарақат алған сәбидің өмірі үшін күресті. Бала ауруханаға өте ауыр жағдайда жеткізілген болатын. Бүгін, 1 тамызда, оның жағдайы күрт нашарлап, жүрек соғуы тоқтады.

«Сағат 20:10-да жүрек қызметі тоқтап қалды. Сағат 20:40-та баланың өлімі тіркелді. Өкінішке қарай, сәбидің өмірін сақтап қалу мүмкін болмады»,  деп хабарлады Павлодар облыстық балалар ауруханасы.

Айта кетейік, 30 шілде күні Павлодар қаласында бір әйел бесінші қабаттағы пәтерінің терезесінен екі баласын лақтырып, артынан өзі де секіріп кеткен. Олар дереу жедел жәрдеммен ауруханаға жеткізілді.

2017 жылы туған баланың жағдайы орташа ауыр деп бағаланған. Ал 2024 жылы дүниеге келген сәби кеше, 31 шілдеде ауыр жағдайда қалды. Дәрігерлер оған шұғыл түрде операция жасап, бүйрегін алып тастауға мәжбүр болған. Бұл шешім қан кетудің көптігі мен жалпы жағдайының күрт нашарлауына байланысты қабылданған.