Павлодарда бір жарым жастағы бала тазартқыш сұйықтық ішіп, мүгедек болып қалды

Павлодарда бір жарым жастағы бала абайсызда тұрмыстық тазартқыш құралды ішіп қойып, өңешін қатты күйдіріп алған. Қазір сәби гастростомамен өмір сүріп жатыр, деп хабарлайды Orda.kz.

Павлодар тұрғыны әлеуметтік желіде ұлымен болған қайғылы жағдай туралы айтып берді. Оның сөзінше, бір жарым жастағы бала байқамай «Азелит» атты тазартқыш құралды ішіп қойған.

Салдарынан баланың өңеші қатты күйіп, ауыр жарақат алған. Дәрігерлер баланың өмірін сақтап қалу үшін шұғыл медициналық көмек көрсеткен. Қазір сәби гастростомамен өмір сүріп жатыр, яғни тамақ арнайы түтік арқылы беріледі.

Баланың отбасы ем алу үшін үнемі Астанаға барып тұрады. Анасы болған жағдайды өте ауыр қабылдап, өзін кінәлі сезінеді.

«Мен өзімді кешіре алмаймын. Бір сәттік немқұрайлықтың салдары осындай болды», — дейді ол.

Қазір балаға ұзақ уақыт ем қабылдау қажет. Дәрігерлер оның жағдайын бақылауда ұстап отыр.

Мамандар ата-аналарды тұрмыстық химиялық заттарды балалардың қолы жетпейтін жерде сақтауға шақырады. Өйткені мұндай құралдар кішкентай балалар үшін аса қауіпті болуы мүмкін.

Оқи отырыңыз:

• Таразда 9-сынып оқушысын жеті қыз жабылып кастетпен ұрып кеткен
• Атырауда 21 жастағы жігіт бірнеше сағат бойы қызды азаптап, оны әлеуметтік желіге жариялаған
• Атырауда Наурыз бен Мейрамгүлдің жаназасы шықты: Қайын жұртын қырып салған күйеу бала