Павлодарда алимент төлемей жүрген әкелердің қарызы 1 млрд теңге болды

Еңбекке жарамсыз балалары, ата-аналары мен жарына қаржылай көмек көрсетуден қашып жүргендер көп деп хабарлайды Orda.kz порталы inbusiness.kz-ке сілтеме жасап.

Павлодар облысында 335 алимент мәселе туғызып отыр, оның сыртында 342 орындау ісі уақытша тоқталып тұр. Себебі, оларды өтеуі тиіс азаматтарға іздеу салынған.

Жалпы, өңірдегі алимент төлеушілердің барлық берешегі – 818 млрд 143 млн 415 мың теңге. Жыл басынан бері құзырлы органдар оның тек 79 млн теңгесін өндіріп алған. Ал қалғаны әлі күнге дейін  төленбей келеді.

«Облыстың әділет департаментінде алиментті өндіріп алуға қатысты 16 115 құжат бар. Оның 8980-і мерзімдік орындауда болса, 7175 тұрғын өзін-өзі жұмыспен қамтып, төлемді өздері аударады. Міндетті төлемдерден жалтарып жүрген азаматтармен жұмыс аясында бірқатар шаралар қабылданды. Мәселен, Әкімшілік кодекстің 669-бабы бойынша алимент төлеуге тиіс 39 адам жауапқа тартылды. Тағы 17 азаматқа айыппұл салынып, 22 тұрғын қамауға алынды. Полиция департаменті алимент бойынша берешек 10 адамды жауапқа тартты», - дейді Павлодар облыстық әділет департаменті басшысының орынбасары Айдын Сәменқұлов.