Өскемендегі қақ айырылған көпірді жөндеудің орнына жаңасын салатын болды

Өскеменде 1 қыркүйекте Үлбі өзені арқылы өтетін Шнайдер көпірі қирап, қақ айырылып қалды. Құрылысты қалпына келтіру жұмыстарын жүргізу жоспарланған еді. Алайда, облыстық мәслихат сессиясында ШҚО әкімі Нұрымбет Сақтағанов көпірді қалпына келтірудің орнына сол жерде жаңа көпір салынатынын айтты, деп хабарлайды Orda.kz.

Бұған дейін Orda.kz Шнайдер көпірін жөндеуге 1,2 млрд теңгеден астам қаржы бөлінгенін жазған еді. Бұл ресми түрде айтылған 600 млн теңгеден екі есе көп. 

Көпірдің опырылуына байланысты ҚР Қылмыстық кодексінің 278-бабының 2-бөлігі (сапасыз құрылыс) бойынша қылмыстық іс қозғалды.

Шнайдер көпірі 1978 жылы салынған, соңғы екі жылда осымен екінші мәрте апат болып тұр. Қалада Үлбі арқылы өтетін бар болғаны үш көпір бар, сондықтан бұл жағдай көлік қозғалысына айтарлықтай әсер етті.

Айта кетейік, 14 қазан күні Семей қаласының жаңа әкімі болып Әділет Қожанбаев сайланды.