Оралда сот төрағасы сот залында қамауға алынды

Орал қалалық сотының төрағасы Руслан Жұмағұлов алаяқтық жасағаны үшін кінәлі деп танылып, сот залында қамауға алынды, деп хабарлайды Orda.kz.

«Мой город» басылымының мәліметінше, Тасқала аудандық сотында Орал қалалық сотының төрағасы Руслан Жұмағұловқа үкім оқылды. Өткен жылдың қараша айында жоғары лауазымды судья пара алып жатқан кезде қолға түскен болатын.

Іс материалдарына зер салсақ, Руслан Жұмағұлов қаржылай пайда табу үшін қасақана ауыр сыбайлас жемқорлыққа барып, қылмыс жасаған. Мәселен, 2024 жылғы 19 маусымда бұрын адам өлтіру және қарақшылық үшін 14 жылға сотталған ер адам шартты түрде мерзімінен бұрын босату туралы өтініш хат берді. Ол судья Орал қалалық сотындағы Хайрушеваның алдына келіп түсті. Хайрушева бұған дейін Жұмағұловтың хатшысы болып жұмыс істеген. Сондықтан Жұмағұлов оған сөзі өтетініне сенімді болса керек.

Сотталушы адвокат ретінде Нұржігіт Фазылғалиевті жалдады. Оған бұл істе танысы көмектесті. Адвокаттық қызметі үшін ол 200 мың теңге сұрады. Алайда ол материалдық пайда тауып, жауапты тұлғаға пара беруді ұйғарды. Фазылғалиев сотталушының танысына судьяға пара беру керектігін айтқан, ал ол бұған келіскен.

29 қазанда Нұржігіт Фазылғалиев Жұмағұловқа жеке өзі хабарласып, қорғауындағы адамға көмектесуін сұрады.

«Осыған байланысты Жұмағұлов қылмыстық ниетпен адвокат Фазылғалиевтің өтінішін орындағысы келмей, аталған мәселені шешу оның лауазымдық өкілеттіктеріне жатпайтынын түсінген. Алайда ақыры көмектесуді сылтауратып, көрсетілген соманы алдау жолымен иемденуге шешім қабылдап, оған көмектесуге уәде берген. Алайда іс жүзінде Жұмағұлов судья Хайрушеваның шешіміне ықпал ете алмады», – деп жазылған айыптау актісінде. 

Одан әрі Фазылғалиев Жұмағұловтың сөзіне сеніп, қорғауындағы сотталушыға судьяға 1,5 миллион теңге пара беру керектігін айтқан. Бұл ретте адвокат параның бір бөлігін өзіне қалдыруға шешім қабылдады. Алайда ол сенген адам ҰҚК-ге хабарласып мән-жайды жайып салады. Сол күні кешке қызметкерлердің бақылауы бойынша Фазылғалиевке 800 мың теңге берген.

Фазылғалиев 1,1 миллион теңгені жымқырып, өз қажеттілігіне жұмсаған, 200 мың теңгені Жұмағұловқа берген. Ол Орал қалалық сотына келіп, ақшаны қызметтік кабинетінің сейфіне салған. ҰҚК қызметкерлері оның кабинетін тінтіп, сол ақшаны тапты. Сөйтіп, Жұмағұлов өзінің қылмыстық ойын соңына дейін жеткізе алмады.

Бұған дейін Руслан Жұмағұлов үйқамақта болған. Үкім шығарылғаннан кейін судьяны сот залында қамауға алды. Бұдан былай Жұмағұловқа мемлекеттік қызметте лауазым иеленуге тыйым салынған еді.

Ол да сот залында қамауға алынды. Фазылғалиевке үш жылға адвокаттық қызметпен айналысуға тыйым салынды.

Сотталушылардың өздері кінәсін толық мойындап, процессуалдық келісімге қол қойды.