Оралда полициядан қашқан ұры жол апатына себеп болып, бір адам қаза тапты

Оралда белгісіз ер адам көлік ұрлап, полициядан қашып бара жатып жол апатына ұшырады. Салдарынан бір адам қаза тапты, деп хабарлайды Orda.kz.

Әлеуметтік желілерде полиция қуған Renault Logan автокөлігінің видеосы тарады. Қашып бара жатқан көлік қиылыста тағы екі көлікке соғылған.

Апаттан кейін ұрланған көлік өртеніп кетті. Полиция қызметкерлері кінәліні көліктен шығарып үлгерген. Соғылған көліктердің біріндегі адам оқиға орнында көз жұмды.

Ұры ауруханаға жатқызылды, палата есігінде полиция күзетшілері тұр.

Еске сала кетейік, бұған дейін Жамбыл облысында полиция департаменті басшысының орынбасары Құттыбаев ұсталды.