Оңтүстік Кореяда жарияланған әскери жағдай «жарамсыз» деп танылды

Кеше, 3 желтоқсан күні кешке Оңтүстік Корея президенті елде әскери жағдай енгізген еді. Бірақ парламенттегілер қарсылық танытып, әскери жағдайды алып тастады, деп хабарлайды Orda.kz. 

Кеше ел президенті Юн Сок Ёль КХДР-дың «жақтастарымен күресу» мақсатында осындай шара қабылдағанын хабарлаған едік.  Төтенше әскери жағдайдың енгізілуіне наразылық білдіруші халық парламент ғимаратының маңына жиналды. Жергілікті БАҚ мәліметінше, елде саяси қызметке, парламент пен саяси партиялардың жұмысына тыйым салынған.

Кейін Оңтүстік Кореядағы төтенше жағдайға байланысты Қазақстан елшілігі қазақстандықтарға үндеу жасады. Елшілік Корея Республикасы Президенті Юн Сок Ёльдің әскери жағдай енгізуіне байланысты Корея Республикасында жүрген Қазақстан азаматтарын сабырлылық сақтап, жергілікті биліктің ұсыныстарын орындауға және көпшілік іс-шаралардан аулақ болуға шақырды.

 ҚР азаматтары үшін төтенше жағдай туындаған жағдайда жедел байланыс үшін +8210-6572-9311 телефоны арқылы Елшілікке хабарласуды сұрады. 

Оңтүстік Кореядағы наразылыққа байланысты парламент төтенше әскери жағдайды алып тастады. 

Парламенттің елдегі әскери жағдайды жою туралы шешіміне Оңтүстік Корея президентінің бағынбауы қылмыс болып саналады. Оңтүстік Корея оппозициялық партиясының төрағасы осылай деп мәлімдеді. Корея Республикасының Ұлттық ассамблеясы әскери жағдайды алып тастауды талап етіп, дауыс берді. Конституцияға сәйкес, парламент депутаттарының көбі талап етсе, соғыс жағдайы алынып тасталуы керек. Мәләметтерге сүйенсек, әскери жағдайдың күшін жоюға 190 депутат дауыс берген. Осыдан кейін парламент спикері У Вон Сик әскери жағдайды «жарамсыз» деп жариялады.