Оңтүстік Кореяда экс-президент Юн Сок Ёльдің жұбайы қамауға алынды

Бұрынғы бірінші ханымға парақорлық және акциялар арқылы алаяқтық жасады деген айыптар тағылып ұсталды, деп хабарлайды Orda.kz

Yonhap агенттігінің мәліметінше Сеул соты арнайы прокурордың өтініші бойынша оны қамауға алу туралы ордер берді.

Сот оны айғақтарды жасыруы немесе жоюы мүмкін деп санаған. Тергеу нұсқасы бойынша, Ким Гон Хи заңсыз табыс алуға мүмкіндік беретін бағалы қағаздармен алаяқтық жасаған.

Сонымен қатар, оған байланыстары мен ресурстарын пайдаланып сайлау нәтижесіне әсер етуге талпыну, сондай-ақ саяси қызмет көрсету үшін қымбат сыйлықтар алу айыптары тағылған.

2024 жылдың 3 желтоқсанында Юн Сок Ёль елде әскери жағдай енгізуге тырысқан. Бұл жаппай наразылық тудырып, ақыры импичмент жарияланды.

Ол шамамен екі ай қамауда болды, кейін босатылды.

2025 жылдың шілдесінде Сеул соты бұрынғы президентті қамауға алу туралы тағы да ордер берді. Юнға заңсыз әскери жағдай енгізу, бүлік ұйымдастыруға талпыныс және қызмет бабын асыра пайдалану айыптары тағылған.

Бұл үшін оған өлім жазасына дейінгі қатаң жаза қолданылуы мүмкін.

Жақында Оңтүстік Кореяның жаңа президенті Ли Чжэ Мён Қасым-Жомарт Тоқаевты Сеулге шақырды.